رد الفنان عمرو سعد، على الانتقادات التي وُجهت لمسلسله الرمضاني “سيد الناس”، والتي ركزت بشكل خاص على الصوت المرتفع أثناء أداء الممثلين والمبالغة في التمثيل، مؤكدًا أن هذه الانتقادات لم تكن كلها موضوعية.
وقال سعد خلال لقائه مع الإعلامي شريف عامر في برنامج “يحدث في مصر”: “اتضايقنا في الأول من انتقادات الصوت العالي، لكن بعد كده فهمنا إن مش كله حقيقي، وبعض الناس بقت بتحط الترويج لأعمالها على السوشيال ميديا فوق كل شيء، وده خلّى النقد مش دايمًا نقي”.
وأضاف: “إحنا معانا مهندس صوت بيشتغل ضمن معايير معينة، والصوت ده جزء من الصناعة، والناس مش دايمًا فاهمة إن الشغل ده له أدواته ومش عشوائي، وبعدين فيه ريموت كنترول، اللي مش عاجبه يعلي أو يوطي أو يغيّر القناة”.
وعن مشهد المقبرة، قال عمرو سعد: “محمد سامي اتخض وحصل اختلاف غير عادي وبدأوا يسألوا شيوخ في الأزهر، ومشرف الإنتاج رفض تمامًا وقال هيبلغ عننا في المحطة، وعملوا ديكور مخصوص للمشهد ده وبعدين حصل تراجع تاني، وقولت هعمل مشهد محدش من الشيوخ هيعترض عليه علشان المشاعر، وكلموا أحد الشيوخ الكبار وقال بلاش لأنه حرام، وأنا قولتله يا مولانا طيب ما القتل والزنا والسرقة حرام وبنعملها في السينما، وقولنا نصور ونشوف وبقت إيدي على قلبي لما سلموا الحلقة”.
قصة مسلسل “سيد الناس”
تدور أحداث المسلسل حول شخصية “الجارحي أبو العباس”، الشاب القادم من منطقة السبتية والذي يُلقب بـ”سيد الناس”، يدخل السجن بديلًا عن والده، وعند خروجه يكتشف أن أسرته تنتظر وفاة والده لتقسيم الميراث، ما يدفعه لكشف سر أخفاه والده عنه طوال 20 عامًا، في ظل صراعات عائلية وضغوطات تحمل مسؤولية الإرث.
أبطال العمل
“سيد الناس” من بطولة عمرو سعد، ريم مصطفى، أحمد زاهر، أحمد رزق، إلهام شاهين، إنجي المقدم، خالد الصاوي، نشوى مصطفى، رنا رئيس، ملك أحمد زاهر، أحمد فهيم، منة فضالي، محمود قابيل، طارق النهري، ياسين السقا، جوري بكر، إنجي كيوان، وساندي علي. المسلسل من تأليف خالد صلاح وإخراج محمد سامي.
