خرج أحمد سيد زيزو، نجم فريق الزمالك، عن صمته للرد على ما يتردد في الفترة الأخيرة بشأن توقيعه لأحد الأندية، مؤكدًا تمسكه بالتزامه مع القلعة البيضاء، ومطالبًا بتوضيح موقف النادي من مسألة تجديد عقده.
وأكد زيزو، أنه لم يوقع لأي نادٍ داخل أو خارج مصر، نافيا كل ما يُشاع بشأن انتقاله للنادي الأهلي، وأنه لا يزايد أو يضغط، لكنه ينتظر ردًا واضحًا من إدارة الزمالك حول مستقبله.
وأوضح اللاعب أن عقده الحالي ينتهي بنهاية الموسم، وأنه رغم امتلاكه عروضًا تصل قيمتها إلى خمسة أضعاف العرض المقدم له، إلا أنه فضل انتظار قرار ناديه الحالي احترامًا للكيان، ومراعاةً للظروف المحيطة بالفريق، خصوصًا في ظل المشاركة بالكونفدرالية الإفريقية.
وكتب زيزو عبر صفحته الرسمية بموقع “فيس بوك”: “الحمد لله. أنا راجل بحترم كل الناس. لكن للأسف عدم ردي علي المعلومات المغلوطة، والتزامي، كل ساعة خبر عن توقيع أو تجديد عقد زيزو، وكل واحد بيغازل الشريحة اللي عايزها من الجمهور بسبب خبر رايح وخبر جاي”.
وتابع: “بكل وضوح أنا لم أوقع لأي نادي سواء داخل أو خارج مصر. اللي حصل على توقيعي يتفضل يعلن.. إذا كان كلامه صحيح؟ ..كمان اللي عنده دليل على توقيعي لأي نادي برضو يتفضل يطلعه على الملأ.. الناس لازم تعرف كويس. انا بقدر جدا الكيان الكبير اللي أنا بلعب فيه، ولا يمكن أنكر فضله عليا. لكن فيه حاجة أنا مكنتش حابب أتكلم فيها خالص.. لأنه للأسف الأمور في الإعلام كلها في اتجاه واحد، ليه محدش اتكلم عن حقوقي المشروعة زي أي لاعب في الدنيا.. ليه محدش اتكلم إن الناس سابتني بقالها شهور طويلة ومش عايزين يجددوا عقدي. ليه محدش اتكلم عن المستحقات المتأخرة اللي ليا بقالها كتير. ومش لاقي حد يجاوبني. ليه محدش اتكلم انه التجديد المرة دي جاي في مرحلة متقدمة من عمري بالنسبة للعيبة الكورة.. ولعيب الكورة مهما طول. عمره قصير في الملعب”.
طالع أيضًا | “تسريبات وشتائم وتحذير من الأهلي”.. زيزو يروي كواليس صادمة ويفتح النار على ميدو ومجلس الزمالك
وأضاف: “وأكيد كل واحد فيكم عنده أسرة. وعليه التزامات كتير.. محدش كمان اتكلم إنه ربنا سبحانه وتعالى أنعم عليا بعروض مقابلها المالي 5 أضعاف العرض اللي موجود.. ورغم كل ده. قلت وهفضل أقول أنا منتظر كلمة النادي. وده لإعتبارات كتير. مش لتجميل الصورة. والجماهير لازم تكون عارفة الحقيقة.. زيزو مش بيزايد.. ولا بيتاجر..لكن لازم الطرف التاني يكون عايزني أكمل.. وتكون فيه استجابة لربع المعروض عليا على الأقل”.
وشدد: “لكن للأسف الكلام معايا حاجة..واللي بيتقال للإعلام حاجة تانية..أنا مينفعش أجرح في حد. ولا أتكلم في حق حد.. لأن اللي بيتقال في الجلسات عيب يتقال برة..على الأقل من ناحيتي..أنا مستني رد النادي لحد آخر يوم في الكونفدرالية..وأتمنى ربنا يكرمنا بيها أنا وزمايلي. وأي كلام هيتقال غير كدة في موضوع التجديد أو التوقيع قبل الموعد ده. هيكون كلام غير صحيح”.
واختتم: “ورسالتي الودية جدا للمسئولين في النادي اللي أنا بحترمهم جميعا..أتمنى الحوار في مسألة تجديد العقد يكون بيني وبينكم.. مش عن طريق الإعلام..وأنا كنت ولا زلت واضح معاكم في كل اللي اتكلمت فيه من أمور عادلة تساعدنا على إننا نكمل الطريق. شكرا على تفهمكم موقفي”.
